Aksie / Action

Engel Harmse en die Renosterhoring

Engel Harmse en die Renosterhoring

Dinge het nie vir Engel uitgewerk nie. In daardie wilde dae net voor die ANC oorgevat het, was hy op 'n bus vol polisiemanne op pad na 'n situasie waar daar agt aktiviste doodgeskiet sou word. Die nuwe regime het nie daarvan gehou nie, ten spyte van die feit dat die bus nooit by die toneel opgedaag het nie. Engel, 'n Speurder-sersant met twintig jaar ondervinding, meeste daarvan as ondersoekbeampte by sommige van die mees berugte misdaadtonele in Suid-Afrika se geskiedenis, is uit die Mag geboender sonder pensioen, sonder sy medaljes. Oneervol. En hy het gatskraap aan die tjoekie ontkom.

Dit was 'n donker tyd na sy ontslag. Toe gaan sit hy vir 'n week onder 'n boom voor 'n rondawel in die Soutpansberg en figure uit wat om te doen. En met worstelinge en aanvegtinge, soos sy oorlede pa altyd gesê het, is hy deur die drif. Die Klipdrif.

Engel was 'n lewenslange ere-veldwagter van die Krugerwildtuin. Vir hom was die enigste pad wat oorgebly het, buiten die Drif en die Webley wat sy oupa van 'n Kakie afgeneem het, die een terug na sy eerste liefde – wildbewaring. Goed, die tweede een. Die eerste was steeds speurwerk. Maar speurder is nie iets wat jy doen nie; dis iets wat jy is.

Hy leen die rondawel vir nog 'n paar weke, leen geld vir kruideniersware en lidmaatskapfooie uit bronne waaraan hy nie te mooi wil dink nie, studeer eers net vir die basiese wildbewarings-sertifikasies, en laat 'n voëltjie los om in al sy ou kringe in Johannesburg te fluit dat hy beskikbaar is om sekuriteit te hanteer by enige wildreservaat in Suid-Afrika.

Een van sy ou 'kliënte,' Lovemore Sibanda, het destyds die owerhede oortuig – en miskien was dit waar – dat hy banke beroof het om die ou bestel tot 'n val te help bring. So het fortuine in daardie tyd gewissel: van tronkvoël tot eienaar van 'n ekslusiewe privaatwildtuin in Noord-Limpopo. Hy het ook seker maar 'n geldjie weggesit na een van sy rooftogte. Maak nie saak nie.

Die Makapan Game Reserve is naby Thohoyandou, die voormalige hoofstad van die voormalige tuisland, Bavenda. Nee wag, eintlik is dit nie naby Thohoyandou nie, dis naby boggerol. En dit is juis die probleem – die wildstropers dink dis hulle speelgrond. Lovemore is 'n hele lys van dinge, en Engel kan hulle vir jou op sy vingers aftel, maar stupid is nie een van hulle nie. In daardie groot kop van hom, blink soos 'n nuwe ghoen, het die man twee en twee bymekaargesit, en die antwoord was Engel Harmse se telefoonnommer. Hy kontak die één man wat die situasie kan hanteer. Die man wat hom destyds vir jare weggesit het.

En nou is Engel Harmse die hoofbewaarder van die MGR. En hy werk vir Givemore Sibanda. En weet jy wat? Dis oukei. Dis nog steeds beter as om sonder 'n toekoms in 'n rondawel in die Soutpansberg te sit.

Maar een ding is seker – Engel wil nooit weer iets met die polisie te doen hê nie. Hy kry 'n kramp op die krop van sy maag as hy 'n polisie-uniform sien. Sy vuis bal agter sy rug as hy met een van die nuwe snotkoppe moet praat. Aan die grootkoppe wil hy liewer nie dink nie. Nee wat, hy is klaar met dáárdie klomp.

Hy sal die renosterstropers self moet uitsorteer. Hy's juis lús vir hulle.

More info →